ليله من ليالى البانجو

انطلق الصديقان فالح و ناصح بسيارتهما الى مكان بعيد فى أطراف المقطم و ركنا السيارة على هضبة صغيرة و أخذا يمشيان حتى تعبا فجلسا على الأرض و بدأ الأثنان فى تأدية واجبهما اليومى من تدخين البانجو المحبب لهما أكثر من أى شئ آخر , تأمل فالح فى الظلام الدامس الذى أمامه و شد نفسا عميقا من البانجو و هو يقول :
_ تعرف يا ناصح .... نفسى أعمل حاجة كبيرة قوى و أبقى انسان عظيم زى سعد زغلول و طلعت حرب و محمد أحمد
نظر اليه صديقه بغيظ و هو يسحب نفسا أشد من نفس فالح بكثير :
* محمد أحمد مره واحده .... يا عم خليك على قدك ..... محمد أحمد مين ؟!!!!
_ هههههه ... هو أنا قلت محمد أحمد ؟!!!!
*اهو ده عيب البانجو الوحيد .... يخلى الواحد يسمع حاجات ما اتقالتش اساسا ....
استمر الصديقان فى شرب البانجو حتى أفاق ناصح على سؤال نسى أن يسأله منذ فترة
* و عايز تبقى انسان عظيم ازاى يا فالح افندى ..... تكونش ناوى تبنى الهرم من تانى ؟!!
_ و الله فكره .... ابنى هرم جديد زى جدو خوفو و اسمى يتكتب فى التاريخ
* خوفو مين ؟ .... مش ده اللى حرر فلسطين برضه من ايدين قوات المحور فى حرب طرواده ؟
_ يامسطول ... خوفو ده اللى بنى الهرم الوسطانى و برج الجزيره و هو اللى نقل موقف أحمد حلمى
شد ناصح نفسا عميقا و هو يقول
* و الله .... باين الواحد نسى العلوم و الانجليزى اللى درسناهم ..... تصدق مش فاكر أى حاجه عن خوفو
_ و لا يهمك ارجع لكتب النحو و انت تفتكره كويس
استمر الصديقان فى تدخين البانجو حتى تذكر ناصح ان للحديث بقية لم يكملاها فسأل صديقه :
* ما قلتليش ناوى تبنى هرم بجد ؟
_ و ليه لأ ... مش أنا حفيد خوفو .... و هو يزيد عنى فى حاجه , بس عايز الهرم اللى ابنيه يبقى جديد و احسن
* ايه رأيك لو تبنى هرم كروى الشكل ؟
_ فكرة غبية طبعا
* ليه ؟
_ أى شوية هوا أو لو حد شاطه حيدحرج على الأرض و ييجرى
* معاك حق ... أمال ناوى تبنيه ازاى ؟
_ استنى كده لما آخد نفس و افكر
وشد فالح نفسا أعمق من الخيال و صاح فجأة
- وجدتها .... وجدتها
* هى ايه اللى وجدتها ؟
_فكرة الهرم ....سأبنى هرما مقلوبا قمته لأسفل و قاعدته لأعلى .... ايه رأيك ؟
*فكره هايله لكن فيه مشكله
_ مشكلة ايه ؟
* لازم تخلى الناس تمشى فوق
_ ليه ؟!
* انت نسيت قاعده فيثاغورث ؟
_ بتقول ايه القاعده دى ؟
* بتقول " القمة قمة و القاعده قاعده " و عشان يبقى الهرم مقلوب و قاعدته فوق يبقى لازم الناس تبقى فوق ...... مش كده و لا ايه ؟
شد فالح النفس قبل الأخير و قال :
_ معاك حق يا ناصح افندى ... طب والحل ايه .... ازاى اخلى الناس تمشى فوق ؟!
* بسيطه قوى نقلب الأرض و بكده يبقى الناس فوق و السما تحت و يبقى الهرم قاعدته فوق و قمته تحت
انفجر فالح فى البكاء المرير فجأة و بعد أن هدأ سأله ناصح عن السبب فأجابه :
_ و كده يبقى عملنا ايه يا ناصح ... ما هو الهرم بقى قاعدته فوق و الناس فوق و قمته تحت و السما تحت يبقى الهرم لسه معدول مش مقلوب زى ما انا عاوز اعمله
* خلاص ما تزعلش يا صاحبى نفكر فى حل تانى
شد فالح النفس الخير و فجأه تألقت عيناه و نظر الى السيجاره بتعجب
_ انا جتلى فكره حلوه قوى ... احسن من الهرم المقلوب
* ايه ؟
_ انا هعمل هرم كبير ... بس الفرق هيبقى هو معمول من ايه
* هتعمله من ايه يعنى ؟
_ هعمل هرم كبير قوى من البانجو و اطلع منه خطوط تدخل كل بيت علشان الناس كله يبقى تفكيرها عالى و محدش يزعل لو سيجارته خلصت زى ما هنزعل دلوقتى
نهض فالح من مكانه و احتضن ناصح و قال :
* هيا دى الأفكار الحلوه بجد يلا نروح ننام شويه علشان بعدين نقعد نخطط للمشروع الوطنى ده
_ تفتكر هيكرمونا على الفكره دى ؟؟
* طبعا ده احنا هنساعد الشعب
_ شعب مين ؟
* مش عارف
_ هو احنا فين ؟
* مش شايف
_ هو انت مين ؟
* مش فاكر
_ و لا انا
* طيب يلا نشوف حد يوصلنا البيت